Satya Nandang Pakeweh
Pengawit
Paplajahan puniki ngajahin indik para pengiring Sang Hyang Tunggal sane kukuh nandang sengsara ritatkala ngiring Ida.
Yadiastun para pengiringe punika akeh nandang sengsara,
irika Sang Hyang Tunggal tetep nyarengin ipun sami.
Tiga pengajahan sane ngawitin puniki kaambil saking Cakepan Daniel.
Paindikan sane wenten ring Cakepan Daniel puniki mamargi kirang langkung duang tali telung atak (2.600) tiban sane sampun lintang.
Duk punika,
wenten makudang karajaan ageng ring Timur Tengah minakadi Karajaan Babel,
Karajaan Media lan Persia,
miwah sane lianan.
Ring wawidangane punika,
wenten pada karajaan alit sane kasambat Karajaan Yehuda,
sane madue ibukota Yerusalem.
Irika,
para pengiring Sang Hyang Tunggale nyembah Ida kamanten.
Ipun nenten ja nyembah dewa-dewa lan togog-togog.
Tur wenten ajeng-ajengan sane kaanggep cemer olih ipun.
Ajengane punika ajengan sane kaaturang kapining para dewane utawi sasembahan lianan,
artine lianan kapining Sang Hyang Tunggal.
Ceritane puniki kakawitin sekadi puniki:
wenten tentara saking Karajaan Babel sane ngejuk makudang para anak truna saking Karajaan Yehuda tur makta ipun ka Babel,
kadadosang tawanan.
Irika ipun sami kadadosang warga Babel mangdane ipun lali ring budaya lan kapracayaan ipune.
Raja Babel meled mangda para pemimpin negara sane kajajah punika nenten malih ninutin adat lan kapracayaan ipune,
nanging ninutin budaya lan kapracayaan ring Babel.
Idumun,
indike punika biasa kalaksanayang yening karajaan sane sitengan nyajah negara lianan.